Зибери: Заев и Мицкоски, вие не сте сопственици на оваа земја

Добивај вести на Viber

Вие не можете да го негирате правото на Албанците да имаат премиер Албанец, вие не сте газди и сопственици на оваа земја, им порача Насер Зибери кандидатот на ДУИ за премиер, на лидерите на СДСМ, и ВМРО-ДПМНЕ, Зоран Заев и Христијан Мицкоски. 

Вели дека ја прифатил идејата на ДУИ затоа што верува во неа. 

„Како пратеник неуморно се залагав за заштита на правата на Албанците, а бев и член на преговарачкиот тим кој во името на Али Ахмети работеше на постигнување мир, кој беше крунисан со Охридскиот договор. Убеден сум дека оваа задача ќе ја исполнувам во името на сите граѓани, не само на Албанците туку и на другите заедници, без оглед на националноста, религијата, политичката припадност“, рече Зибери.

ДУИ од Преспа ја започна предизборната кампања под мотото „Време е за премиер Албанец“.

Зибери пред да стане политичар, бил новинар, а повеќе од 10 години не е активен во политиката, односно за цело ова време работи како нотар. 

Во 90-тите како кадар на ПДП влегува во политиката и во периодот од 1996 до 1998 станува министер за труд и социјална политика во Владата на Бранко Црвенковски.

Првиот човек на ВМРО-ДПМНЕ, Христијан Мицкоски претходно кажа дека тој е кандидат за премиер, Заев е кандидат на СДСМ, а ДУИ треба да каже кој е нивниот кандидат.