Компјутерска злоупотреба: Владата нуди надомест од 100 евра!

Добивај вести на Viber

Владата ја предупреди јавноста да не ги отвара лажните пораки на кои наводно им нуди пари на граѓаните.

Нов линк се шири по социјални медиуми кон сајтот vlada-mk . com преку кој креаторите се обидуваат да дојдат до податоците за вашата платежна картичка. Приказната е дека Владата давала 100 евра по жител за да се „растерети“ инфлацијата.

Доменот е доволно сличен кон оригиналниот за да збуни некој што не се разбира во истото.

„Ја информираме јавноста дека Владата на Република Северна Македонија НЕМА испратено СМС и други пораки во кои нуди надомест. Во конкретниот случај кој се појави во изминатите часови (прикажан на сликите подолу), станува збор за смишинг и фишинг измама која е пријавена и по која соодветните служби веќе постапуваат.

Доколку граѓаните добијат или веќе добиле порака со ваква или слична содржина во која се посочува Владата како испраќач, истата треба да ја сметаат за лажна и да не кликаат ниту на дадените линкови, ниту да одговараат на пораките кои ги добиле.

Апелираме до граѓаните да не наседнуваат на лажни пораки од странски телефонски броеви и мејлови и да не ги даваат личните податоци. Граѓаните треба да бидат внимателни и одговорни околу своите лични податоци, односно да не ги споделуваат и разменуваат со непознати лица, како и со лица на кои не може однапред да им се утврди идентитетот“, порачува Владата.