ГТЦ и со исто темпо на приходи до помала добивка

Добивај вести на Viber

Акционерското друштво за стопанисување со деловен простор Градски трговски центар во првите 9 месеци од годинава успева речиси со исто темпо да генерира приходи како и лани, но сепак стигнува до двојна помала добивка во однос на претходната година. Анализирајќи го деветмесечниот биланс на успех на ГТЦ видливо е дека главна причина за намалената добивка се зголемените оперативни приходи, како и намалените приходи од кредити што можеби во овој период се одразува на вкупниот резултат, но ќе придонесе за помали финансиски расходи во наредниот период.

Како што наведовме приходите на ГТЦ од оперативата се речиси на исто ниво како и лани. За 9 месеци ГТЦ генерирал 148 милиони денари или 3 милиони денари помалку од лани. Главен извор на приходи на ГТЦ е издавање на деловен простор и гледано според квартали годинава трет пат по ред се бележи намалува на истите и ограниченост во создавање на раст од кирии. 

Оперативните расходи на ГТЦ гледано низ главните ставки во првите 9 месеци од годинава се речиси исти како и лани, за трошоци и суровини се издвоени 3,9 милиони денари, а за вработените се потрошени 58,3 милиони денари. Најголем скок има кај останатите расходи од работењето кои во овие 9 месеци достигнале 14,7 милиони денари или речиси тројно повеќе споредено со истиот период во 2016 година.

ГТЦ првите три квартали годинава ги завршува со вкупна добивка од работењето во износ од 16,7 милиони денари, односно со пад од над 50%. Лани добивката во истиот период изнесувала 35,8 милиони денари при што фискалните приходи на ГТЦ изнесувале 12,5 милиони денари.

Да потсетиме и дека во извештајот за првиот квартал од 2017 ГТЦ имаше речиси тројно намалување на добивката која изнесуваше 1,7 милиони денари со вкупни приходи од 50,4 милиони денари. 

Вториот квартал ГТЦ го заврши со драстично намалување на добивката која од 25 милиони денари беше сведена само на 1,8 милиони денари.

ГТЦ во целина се соочува со голема конкуренција од големите и нови трговски центри во Скопје кои располагаат со моќни брендови и се поголем број на клиенти, па се поставува прашањето како овој скопски симбол да го врати препознатливиот сјај. Компанијата успева да одржи некое стабилно темпо на генерирање на приходи, работи во позитива иако добивката се намалува, но нема видлив тренд кој ќе покаже дека возможен е раст, барем засега.

Автор: Христијан Станоевиќ