Добивај вести на Viber
Во Турција денеска е прогласен ден на жалост заради рударската несреќа во Сома, во која животот, според последните податоци, го загубија над 280 рудари.
Уште 120 рудари и натаму не се извлечени од рудникот, но надежите дека преживеале од момент во момент се намалуваат.
Турскиот премиер Реџеп Тајип Ердоган вчера беше пречекан од огромно незадоволство од граѓаните при посетата на местото на несреќата. Семејствата и блиските на загинатите рудари удирале по неговиот автомобил со барање тој да понесе одговорност за една од најголемите рударски катастрофи во Турција.
http://www.youtube.com/watch?v=WTy3SOZrElI
„Вакви рударски несреќи не се случуваат само во Турција. Тие се случуваат и во многу други земји како Соединетите Држави, Кина, Франција, Белгија. Нашата земја не е во подобра позиција“, се правдаше Ердоган кој прогласи тридневна жалост во земјата.
Но незадоволството продолжува и денеска. Синдикатите повикаа на штрајк. Тие апелираа до сите граѓани да ги прекинат работните обврски, да се облечат во црно и да излезат на протест пред ресорното министерство, со барање за подобрување на условите за работа и безбедноста во рудниците.
Спасувачките екипи успеаја да спасат околу 450 рудари од рудникот Сома, кој беше затрупан откако во него се случи експлозија предизвикана од дефект на трафостаница.