Добивај вести на Viber
Косово и Албанија ќе остваруваат потесна соработка кон создавање на заеднички прехрамбен пазар, соопшија денеска министрите за земјоделство на двете земји, Мемљи Красничи и Едмонд Панарити.
Според соопштението, Красничи истакнал дека односите меѓу Косово и Албанија треба да бидат најдобар пример за регионална соработка.
Тој истакнал дека било разговарано и за конкретни чекори кои треба да бидат преземени пред одржувањето на заедничка седница на двете влади во март годинава во Тирана, со што би се развивала соработката меѓу Косово и Албанија во областа на земјоделството, трговијата, увозот и слободното движење на стоки.
Албанскиот министер за земјоделство оценил дека се отстранети препреките во меѓусебните трговски односи за размена на стоки меѓу Косово и Албанија.
„Ги предочивме нашите предлози за изедначување на стандардите за прехрамбените производи, како што се млекото, виното, медот, прехрамбените масла, и очекуваме и косовската страна да даде свое мислење за што побрзо да се излезе со заеднички пакет стандарди за квалитет и сигурност на овие производи“, истакнал Панарити.