ВО ПОСЛЕДНИОТ ГОВОР КАСТРО ЈА НАЈАВИ СВОЈАТА СМРТ: Наскоро ќе завршам како и сите други ...

Добивај вести на Viber

Светот утрово се разбуди со веста дека починал Фидел Кастро. Поранешниот претседател на Куба и водач на Комунистичката револуција почина во 90-тата година од својот живот, јави државната телевизија на Куба.

Повеќе детали не се соопштени.

Фидел Кастро владееше со Куба речиси половина век пред да му ја предаде власта на својот брат во 2008 година.

Последен пат во јавноста се појави во април оваа година, на затворањето на конгресот на Комунистичката партија. Фидел е дочекан со акламација на речиси 1000 делагати присутни на Конгресот на кој не биле повикани странски медиуми.

Кастро во говорот на крајот на собирот рекол дека наскоро ќе умре и ги повика членовите на партијата да помогнат неговите идеи да опстанат, и така на некој начин можеби и ја најави својата смрт.

„Наскоро ќе наполнам 90 години“, рекол Кастро, во своето најдолго јавно појавување во повеќе години.

„Наскоро ќе завршам како и сите други. Времето ќе дојде за сите нас, но идеите на кубанските комунисти ќе останат како доказ дека на оваа планета, ако се работи со жар и достоинство, може да се произведат материјални и културни добра кои им се потребни на луѓето, и потребно е без прекин да се бориме тоа да го оствариме“, рекол тој.

„На своите пријатели во Латинска Америка и во светот треба да им кажеме дека кубанскиот народ ќе победи“, рекол Фидел.

Во конференциската палата во Хавана делегатите се кренаа на нозе и извикуваа „Фидел, Фидел“, штом се појави на подиумот.

Кастро претходно се појави во јавноста на 7 април, прв пат после долго отсуствување од девет месеци, кога во едно училиште во Хавана говореше за позитивните страни на кубанскиот училиштен систем, а пред тоа во јули 2015.

Тој, меѓутоа, до скоро редовно во својот дом ги примаше лидерите на пријателските земји и државните медиуми објавуваа фотографии од тие средби.