ТРЕТА БЛОКАДА КАЈ ЖЕЛИНО: Југохромци бараат да се вратат на работа
Објавено во: Економија 02 Март, 2017
Работниците од фабриката Југохром од Јегуновце денеска го блокираа автопатот Тетово-Скопје, со барање да се вратат на работа.
Тие од 11 до 13 часот ја блокираа наплатната рампа кај Желино. Ова го прават по трет пат со цел да издејствуваат остварување на своите барања.
„Нашите синдикални барања се Владата да овозможи Југохром да ги вклучи печките со работа, а второто кон менаџерскиот тим од кого бараме да се заврши системот за отпрашување. Судбината сега е во раце на Владата, утре имаме средба со премиерот Емил Димитриев и ќе се знае дали ќе одат вработени под Агенција за вработување како невработени или пак ќе се вратат на работните места. Ние како синдикат повеќе не разговараме со менаџерскиот тим за статусот на вработените затоа што сметаме дека се исцрпени сите можности од компанијата да се задржат вработените на работа. Од вчера вработените немаат здравствено осигурување и покрај симболичните плати од 4.000 до 5.000 денари, компанијата не може да ги исплати“ - изјави Светислав Спасовски од синдикатот на Југохром.
Работниците автопатот го блокираа и на 11 ноември 2016 година како и во јануари.