(ФОТО) Во „градот на духови“ по 33 години накитена Божиќна елка
Објавено во: Свет 26 Декември, 2019
За прв пат по 1986 година град во Украина кој бил погоден од катастрофата во Чернобил доби Божиќна елка.
Накитена елка е поставена на главниот плоштад во Припјат, за првпат од катастрофата во нуклеарната централа во Чернобил во 1986 година.
Своевремено дом на повеќе од 47.000 луѓе, три километри оддалечениот Припјат и натаму нема услови за живот. Градот е загаден поради радијација.
Поранешни жители дојдоа во напуштениот град за да ја украсат елката и да направат семејни фотографии. Сето ова е дел од кампања организирана од локалната туристичка организација.
„Градот мора да продолжи да живее“, изјави Катерина Асламова од компанијата „Чернобил тур“.
Туристи од целиот свет доаѓаат да го видат градот.
Познат е како „град на духови“, а десетици негови жители починале од канцер.
Уништена панорама, отровни шуми и боја која се лупи од ѕидовите на зградите, се само некои од погледите кои денеска можат да се најдат во градот Припјат.
Градот е основан во 1970 год, како живеалиште на работниците од Чернобилската нуклеарната централа, и пред катастрофата имал 50.000 жители, а денес нема ниту еден постојан жител.
Целиот град бил евакуиран за два дена по избивањето на катастрофата.
Тој се наоѓа на северот од земјата, на граница со Белорусија.