Промовирање активно граѓанство и унапреден образовен систем

Добивај вести на Viber

Националната агенција за европски образовни програми и мобилност, денеска, организираше Валоризациона конференција со која се одбележа успешната имплементација и реализација на програмата Еразмус плус во 2016 година.

Според директорот на Националната агенција, Дарко Димитров, стапувањето на Република Македонија во програмата на Европската Унија - Еразмус плус, која започна со имплементацијаво јануари 2014 година, е од исклучитено значење, пред сé, за промоција на интернационализацијата на образовните институции, невладиниот сектор и сите останати тела кои се јавуваат како корисници на ниво на Република Македонија.

„Успехот се должи на напорната работа и посветеноста на тимот во промовирање на Програмата и можностите кои ги нуди како нова димензија во областите на образованието, обуката, младинската работа и спортот, а истовремено и на успешното имплементирање на доделените проекти од страна на корисниците и позитивните резултати од нивната имплементација. Перспективите на агенцијата се целосно посветени кон унапредување на македонскиот образовен систем, промовирање на активно граѓанство кај младите луѓе и создавање на подобри можности за сите.Инклузивноста, социјалната кохезија и активното граѓанство се дополнителни придобивки од овој концепт“, рече Димитров пред многубројната публика – професори, ученици, студенти.

Повикот за предлог проекти за 2017 година веќе е објавен и заинтересираните апликанти почнаа со изготвување на своите апликации и финализирање за поднесување во претстојните крајни рокови.

За Муарио Ди Вероли, претставник на Европската делегација во Република Македонија, Еразмус плус програмата е дел од европските програми за образование, едукација, обука, млади и спорт.

„Програмата е многу успешна во однос на промовирање на соработката меѓу Европската унија и земјите - партнери во спроведувањето добри практики. Наредната година, Еразмус плус ќе слави 30 години и станува збор за успешна приказна со која Европската унија се обидува да ги подобри вештините на младите за вработување. Сé уште не се знае буџетот за 2017 година, но најверојатно ќе биде поголем од 5 милиони евра“, рече Ди Вероли на денешната валоризациона конференција.

На валоризационата конференција беше истакнато дека стратешка цел на Националната агенција за европски образовни програми и мобилност, освен програмата Еразмус плус, е да биде одговорна и во своја надлежност да ги превземе и останатите европски иницијативи и мрежи од областа на образованието, обуката и младите. Националната агенција  ги имплементира Европските иницијативи од областа на образованието и младите - Еуропас, Еуродеск, Евридика, Еурогајденс, еТвининг, ЕкВет и Јут.

„На Повикот кој беше објавен за предлог проекти за Програмата Еразмус плус во 2016 година, во Националната агенција за европски образовни програми и мобилност беа пристигнати 328 апликации за проекти, од кои одобрени се вкупно 89 проекти. Нивната имплементација се одвиваа во текот на оваа и ќе се одвиваат уште во наредните две години, во зависност од периодот на времетраење за секој проект одделно“, рече Димитров.

Буџетот за 2016 година, заедно со дополнителните средства кои ги одобри Европската комисија за партнерски проекти, односно Стратешки партнерства во училишното образование, е реализиран 96%. Односно со корисниците потпишани се договори за грант во износ од 4.861.562 евра, што претставува признание за посветеноста на вработените во Националната агенција, но истовремено покажува и високо ниво на информираност на граѓаните на Република Македонија за можностите од Европските програми, како и препознавањето на потенцијалот и важноста од учеството кое корисниците го демонстрираа изминатиов период.