Предстечај за телевизијата на Кочан: Замрзнат имотот на ТВ Нова

Добивај вести на Viber

Централниот регистар објави дека е отворена постапка за отворање стечај над телевизијата Нова. Судското рочиште е закажано за 22 јуни и на него треба да се утврди дали ќе биде отворен стечајот или не. Во меѓувреме Основниот суд одреди Христина Јоновска да биде привремен стечаен управник. Таа, наместо сопствениците на телевизијата ќе располага со имотот на друштвото.

Во одлуката стои и дека Јоновска ќе дава согласност на органите за управување на должникот за сето работење се до конечната одлука дали ќе има или не стечај. Ова решение е донесено за да се избегне можноста да се намали значајно имотот на телевизијата и да се испита дали должникот има имот над кој може да се отвори и е доволен за спроведување на стечајна постапка и намирување на трошоците на стечајната постапка.

„Се одредува општа забрана за располагање со имотот на должникот. Се забранува одредување  или спроведување на присилно извршување или обезбедување против должникот и се забранува исплати од сметките на должникот. Се повикуваат должниците на должникот своите обврски да ги исполнат“, стои во решението од Основниот суд Скопје 2.

Сопственик на телевизијата Нова е бизнисменот Сеад Кочан. Тој сега е обвинет во една од постапките која ги поведе Специјалното јавно обвинителство. Поранешни вработени се доверители затоа што немаат земено шест плати.