ИСТОРИСКИ МОМЕНТ: Tргна возот од Англија кон Кина-патува двапати пократко
Објавено во: Свет 10 Април, 2017
Од Британија тргна првиот директен воз за Кина, натоварен со артикли како што се витамини, производи за бебиња и лекови, пренесе Ројтерс.
Патувањето во должина од 12 000 км од источна Англија до источна Кина, би требало да трае три недели, што е како што наведува Ројтрес, на половина помалку во однос на времето на патување со брод.
Со повеќе десетици контејнери, возот со црвена боја тргна од местото Стенфорд Ле Хоп во Есекс за железничката станица Баркинг во источен Лондон.
Од Баркинг, возот по Евротунелот ќе стигне до Франција, а потоа ќе го продолжи патот низ Белгија, Германија, Полска, Белорусија, Русија и Казахстан пред да го заврши патувањето во кинескиот град Јиву.
„Новата железничка врска со Кина претставува уште еден поттик за глобална Британија после старата трговска рута „Патот на свилата“ за испорачување на британски производи ширум светот“ изјави британскиот министер за трговија Грег Хендс.
Официјален Лондон настојува да ги подобри трговските врски со остатокот од светот, бидејќи се подготвува за излез од ЕУ, наведува Ројтерс, и потсетува дека првиот товарен воз од Кина стигнал во Британија во јануари.