Груевски: криза има, ама пензии ќе растат!

Добивај вести на Viber

Правиме се што е во наша моќ, во овие тешки времиња на европска должничка криза да помогнеме секаде каде што можеме. Спроведуваме реформи во повеќе области. Ќе продолжиме со нашата поддршка, иако ова е тешко време, за да им се помогне на граѓаните, потенцираше доцна синоќа премиерот Никола Груевски и претседател на ВМРО-ДПМНЕ пред жителите на Драчево. И покрај европската должничка криза, и покрај падот на приходите во буџетот, ќе најдеме начин да ги зголемиме пензиите на пензионерите за пет отсто, плус два отсто од оние што се за усогласување, како и за примателите на социјална помош, разни видови на социјална помош, зголемување за пет отсто. Ова се мерки што ќе стартуваат од март следната година, рече Груевски. Неодамна пред бизнисмените премиерот најави и враќање на долговите кон компаниите по основ на ДДВ и за други договорни услуги, кои се проценуваат на над 220 милиони евра. За оваа намена ќе биде земен кредит од комерцијални банки за кој како гарант се јавува Светската банка. Парите се очекува да стигнат на крајот на оваа и на почетокот на следната година.