ФОТО+ВИДЕО: Поплави во Италија - стотици евакуирани
Објавено во: Свет 25 Ноември, 2016
Стотици жители на голем број мали населби во областа Пиемонт во северозападна Италија беа принудени да ги напуштат своите домови поради закана од поплави, соопшти денеска агенција АНСА.
Долготрајните интензивни дождови во регионот предизвикаа пораст на нивото на многу локални реки, вклучувајќи и притоки на По. Нивото на оваа река веќе ја надминува со еден метар нормата која се смета за безбедна, поради што властите затворија некои мостови над неа.
Седумдесетгодишен маж исчезнал недалеку од Торино. Го однела водата при обид да ги спаси коњите, пренесе Франс прес, цитирајќи го неговиот син.
Специјално предупредување за лошото време упатија властите во соседната област Лигурија, каде има поплави речиси секоја година. Во 2011 година загинаа луѓе во Џенова.
Експертите предупредуваат дека над половина од територијата на Италија е со зголемен хидролошки ризик, забележуваат агенциите. За да се избегнат деструктивни последици од дождовите, треба редовно да се чистат речните корита.