ЕУ членките постигнаа консензус за насоките по Брегзит

Добивај вести на Viber

Земјите-членки на Европската унија се согласија со насоките за преговори за излегувањето на Велика Британија од ЕУ, претставени минатиот месец од страна на претседателот на Европскиот совет, Доналд Туск. 

Ова го откриваат извори од Брисел, цитирани од АФП. 

Претставници на 27-те земји одржуваат серија состаноци, откако на крајот на март британскиот премиер Тереза ​​Меј официјално го стартуваше почетокот на Брегзит, а два дена потоа Туск ги претстави своите насоки. 

„Дискусијата ... покажа цврсто единство и консензус на сите основни елементи на нацрт, вклучувајќи и фазен пристап кон преговорите“, вели изворот. 

Според него за земјите од Унијата е приоритет да го решат прашањето со европските граѓани во Велика Британија. 

„Во тој контекст беше потсетено дека несигурноста и поделбата е последица од британската одлука за напуштање“", посочува изворот. 

Околу 3 милиони европски граѓани живеат во моментов во Велика Британија, а уште 1 милиони британски државјани се наоѓаат во различни земји од ЕУ. 

Претставниците на 27-те земји ќе се состанат повторно на 24 април, за да завршат со дискусиите на насоките кои официјално треба да бидат прифатени од лидерите на земјите-членки за време на самитот на 29 април.