Земјотресот бил со епицентар во Албанија – на 120 километри од Скопје
Објавено во: Балкан 01 Септември, 2016
Епицентарот на земјотресот што беше почувствуван ноќеска во 20 минути по полноќ во Дебар, бил на 120 километри југозападно од Скопје, во соседна Албанија.
Потресот бил со интензитет од три степени според Европската макро-сеизмичка скала–1998, соопшти Сеизмолошката опсерваторија при Природно-математичкиот факултет во Скопје.
Земјотресот бил почувствуван и во Дебар и предизвикал вознемиреност меѓу граѓаните. Албанскиот Сеизмолошки институт, претходно информираше дека два часа по првиот потрес следувал уште еден, но со помал интензитет. Првиот потрес, бил со јачина од 4,2 степени според Рихтер, а епицентарот бил на педесеттина километри од Тирана, во близина на пограничните населени места со Македонија, во планинскиот дел помеѓу градовите Елбасан и Булќиза. Земјотресот бил на длабочина од 2 километри.
Потресот е почувствуван и во другите погранични градови на македонска страна, како и во Тирана, Поградец, Елбасан.
Нема штети или човечки жртви во земјотресот.