ЗАДОЛЖИТЕЛНО НОСЕЊЕ МАСКИ: Најмногу казни за скопјани, најмалку изречени во Kуманово

Добивај вести на Viber

Од 1 мај до 21 јули годинава повеќе од 31.000 граѓани се затекнати без заштитни маски и се казнети.

Податоците од Министерството за внатрешни работи покажуваат дека се казнети вкупно 31.211 луѓе.

Бројките покажуваат дека најмалку санкции има во Куманово, но, во СВР Скопје е сосема поинаку.

„8.613 казнети има на подрачјето на СВР Скопје, 5.806 во СВР Тетово, 3.171 во СВР Струмица, 4.083 во СВР Охрид, 1.357 прекршувања има во СВР Куманово, 3.313 прекршоци се регистрирани во СВР Велес, и 2.400 прекршоци имало во СВР Битола“, информираат од МВР.

За заштита од коронавирусот од 23 април за сите граѓани започна да важи уредбата на Владата за носење на лична заштитна опрема за носот и устата и која може да биде: респираторна маска, хируршка маска за еднократна употреба, текстилна маска за повеќекратна употреба, памучна марама или шал, бандана и слично.

Физичката прекривка на носот и устата кај сите граѓани ќе овозможи прекин на преносот на вирусот. Задолжително е носењето на заштитна опрема за покривање на носот и устата во сите јавни затворени простори како што се средства за јавен превоз, маркети, банки, пошти, амбуланти, болници, институции, како и на отворени простори каде што нема можноста за одржување на дистанца од два метри помеѓу граѓаните како што се пазари, отворени трговски центри, тесни улици, автобуски постојки и слично.

Потоа полицијата почна да казнува парично. Глобата за неносење маска чини 20 евра.

Досега над 440 луѓе во земјава починаа поради коронавирусот.

Скоро 4.000 случаи се водат како активни.

Голем број заболени има во скопски Чаир, општина која со месеци е на врвот, но и во источниот дел на Македонија каде во рок од една седмица скокна бројот на заболени.