ПУТИН НАРЕДИ ВЕЖБИ ЗА УПОТРЕБА НА ТАКТИЧКО НУКЛЕАРНО ОРУЖЈЕ - еве која му е целта

Добивај вести на Viber

Руското Министерство за одбрана во понеделникот соопшти дека Русија ќе одржи воена вежба која ќе опфати вежбање на употреба на тактичко нуклеарно оружје, по провокативните закани од западните претставници.

Вежбата, додава Министерството, ја наредил претседателот Владимир Путин, а со неа ќе се тестира подготвеноста на нестратешките нуклеарни сили за извршување на борбени мисии.

Воените маневри, исто така, вклучуваат подготовка и распоредување за употреба на нестратегиско нуклеарно оружје, според Министерството.

Во вежбата учествуваат ракетни формации на Јужниот воен округ и силите на морнарицата.

Русија го има најголемиот арсенал на нуклеарно оружје.

„За време на вежбата ќе се спроведат голем број мерки со цел да се практикува подготовката и употребата на нестратегиско нуклеарно оружје“, соопшти Министерството.

„Целта на вежбата е да се обезбеди територијален интегритет и суверенитет на Русија како одговор на провокативните изјави и заканите на одредени западни претставници против Руската Федерација“, се додава во соопштението.

Руската инвазија на Украина го предизвика најтешкото влошување на односите меѓу Русија и Западот од Кубанската ракетна криза во 1962 година.

Русија ја гледа таа војна како битка со Западот, кој, тврди Путин, ги игнорирал обидите на Москва да создаде пријателски односи по распадот на СССР во 1991 година. Наместо тоа, тврди Путин, целта на Западот била да ја преземе контролата врз Украина и истовремено да го прошири НАТО кон исток.

Западот и Украина тврдат дека нема да застанат додека руските сили не бидат поразени и војната не ја гледаат како империјалистичко навлегување на туѓа територија со цел да ја вратат Украина во руската сфера на влијание.