За набавка на вакцини против Ковид-19 ќе платиме 12,5 милиони евра во 2021

Добивај вести на Viber

Годинава ќе потрошиме 12,5 милиони евра за купување на вакцини против Ковид-19, според измените на програмата за задолжителна имунизација на населението за 2021. 

Според измените, досегашниот износ од 390.000.000 кој беше предвиден од почетокот на годината, на претходната владина седница се заменува со износот 764.304.000 денари, односно речиси за двојно повеќе за набавка на вакцини за пандемијата во текот на оваа година.. 

„Преостанатите средства обезбедни од Буџетот на Република Северна Македонија во висина од 390.000.000,00 денари се наменети за набавка на КОВИД-19 вакцини, согласно потпишаниот договор за набавка на вакцините, со моделот на Обврзувачка набавка (Committed Purchase)“, се вели во претходната програма која беше усвоена на почетокот од годината. 

По ново, вкупната сума што се обезбедува од годинешниот буџет за сите вакцини за имунизација на населението, со новите пресметки, се зголемува од 805 милиони, на 1,18 милијарди денари, или вкупно од 13 на 19,2 милиони евра. 

 Покрај купените, земјата во годината кога започна имунизацијата против Ковид-19 се потпре и на донациите од Србија, Бугарија, Хрватска, Полска, Грција, Русија, Турција и ЕУ. Истовремено има и најави за донации кои се уште се чека да пристигнат во Македонија. Земјата се уште ги чека најавените 250 илјади дози од производителот „АстраЗенека“ од Владата на Данска 

И во Македонија дел од вакцините против ковид наскоро ќе мора да бидат уништени поради тоа што им истекува рокот до крајот на ноември, а едноставно не може да бидат потрошени. Станува збор за вакцините од британско-шведскиот производител АстраЗенека, кои се околу 25.000 на број, а со кои во моментов се врши само ревакцина на граѓани над 60 години.

Во последниот објавен билтен на Министерството за здравство, заклучно со 21 ноември вкупно се вакцинирани 822.751 граѓани, ревакцинирани се 789.905, а трета доза примиле 63.137 граѓани. 57 отсто од граѓаните над 40 годишна возраст се ревакцинирани, а 33 проценти од популацијата од 18 до 39 години примиле барем една доза вакцина. 

Опфатот со вакцинација со една доза вакцина, на полнолетната популација е 58 проценти , а со две дози опфатени се 47 отсто од граѓаните над 18 години. Според бројот на аплицирани вакцини, 39% од целата популација во нашата земја е вакцинирана, а 38% од популацијата во државата примила две дози вакцина.