За кои приватни услуги државната здравствена каса потроши 129,2 милиони евра?

Добивај вести на Viber

Три центри за дијализа и две кардиохируршки клиники наплатиле 28,8 милиони евра од државниот здравствен фонд. Четири правни субјекти добиле 22,3 отсто од сите пари наменети за приватните провајдери и услуги и продавачи на лекови од позитивната листа. Наспроти нив повеќе од 2.800 матични лекари, 777 аптеки, 3 бањи и десетини приватни ординации поделија 100 милиони евра

Приватни клиники, ординации, лаборатори, матични доктори кои имаат склучено договори со државниот Фонд за здравствено осигурување (ФЗОМ) лани наплатиле 129,2 милиони евра за своите услуги што ги давале на пациентите кои се осигуреници на ФЗОМ, покажуваат официјалните податоци од годишниот извештај на фондот за лани. 

Според достапните податоци најголем приватен провајдер на услуги за државниот здравствен фонд е приватната клиника „Аџибадем Систина“ која по два основи (за дијализа и за кардиохируршки интевенции) лани наплатила 12 милиони евра од ФЗОМ односно 9,2 отсто од сите пари кои ФЗОМ ги платил за приватни провајдери на услуги. На второ место е центарот за дијализа „Диамед Македонија“ со 8,39 милиони евра, а на трето е кардиохирургијата „Филип Втори“ со 6 милиони евра.

За што се потрошиле 129,2 милиони евра од касата на државниот Фонд за здравство?

Како агрегатна вредност најголема ставка во ФЗОМ се матичните доктори: општи лекари, стоматолози и гинеколози кои имаат договори со ФЗОМ. Вкупната вредност на нивните услуги е 46 милиони евра и со нив се платени услугите кои ги дале 137 матични гинеколози, 1.532 општи лекари и 1.147 стоматолози.. Од тие пари кај општите лекари завршиле 31,96 милиони евра, кај гинеколозите 4,26 милиони евра и кај стоматолозите 9,8 милиони евра. 

За услугите за дијализа трите приватни центри наплатиле 16,55 милиони евра, а за кардиохирургиите се платени 12,16 милиони евра. Вкупно за лековите од позитивната листа 777 аптеки наплатиле 40,8 милиони евра. Специјалистичките лаборатории наплатиле 9,5 милиони евра.

За процедурите ин-витро оплодување државата преку ФЗОМ лани платила 1,7 милиони евра, за третмани за рехабилитација во три приватни бањски центри се платени 1,25 милиони евра,  а за услуги кои фондот ги покрива приватни очни хирургии наплатиле 1,16 милиони евра.