Вудурис поднесе оставка, тврди дека Грција лошо ја менаџира бегалската криза

Добивај вести на Viber

Генералниот секретар за бегалци во грчкото Министерство за внатрешни работи, Одисеј Вудурис вчера си поднесе оставка од функцијата и обвинува дека Грција не се справува најдобро со бегалската криза.

Оставката премиерот Алексис Ципрас ја прифати попладнето. Вудурис, кој е одговорен за обработка на податоците на бегалците при нивното прво пристигнување, во интервју за телевизијата „Скај“ кажа дека поднел оставка затоа што бил спречен да донесува одлуки. Вели дека има и повеќе отворени прашања  со неговиот претпоставен, заменик-министерот за миграциска политика Јанис Музалас, и додаде дека е „почесно да поднесе оставка“. Го критикуваше Музалас за справувањето со бегалската криза, обвинувајќи го дека не спроведува прописи за подобрување на управувањето со прифатните центри.

Според Вудурис центрите за бегалци се „без раководство“ и тврдеше дека Музалас не му дозволил да именува директори на објектите. Додава дека лошо се управува и со средствата за бегалци.

„Норвешка троши 12.000 евра годишно за секој бегалец, а Грција троши 15.000“ - вели  тој.

Постои загриженост поради зголемените тензии на егејските острови, а родителите не сакаат бегалци да посетуваат настава или да бидат блиску до училиштата каде се образуваат нивните деца.