Вучиќ и Николиќ не го поддржуваат, но не го ни спречуваат референдумот во РС
Објавено во: Балкан 01 Септември, 2016
Србија нема да го поддржи спорниот референдум во Република Српска, но нема ни да интервенира за да го спречи.
Српскиот премиер Александар Вучиќ, по состанокот на државниот врв на Србија со највисоките официјални претставници од Бања Лука во Белград, изјави дека Србија секогаш ќе остане со српскиот народ во Република Српска.
Тој и претседателот на Србија, Томислав Николиќ не го поддржаа одржувањето на референдумот за Денот на Република Српска. Воедно не сакаа да влијаат на промена на ставот на легитимно избраните политички претставници на Србите во Република Српска. „Без разлика на различното согледување на политичките последици од референдумот, кои ги изнесовме на состанокот ние од Србија и политичките претставници на Србите од РС, можам само да порачам дека Србија секогаш ќе биде и ќе остане со нашиот народ во Република Српска“ - вели Вучиќ. Мирослав Додик од Република Српска не сакаше да појасни дали властите во овој босански ентитет, ќе продолжат со референдумот или не.
Одржувањето на референдумот е закажано за 25 септември, а со него се оспоруваат надлежностите на Уставниот суд на БИХ.
Целта на референдумот е да се добие јавна поддршка, 9 јануари да се прославува како Ден на државноста на РС. Уставниот суд на БИХ, лани донесе одлука дека прославата на овој празник на тој датум, е неуставно и дискриминаторски кон граѓаните од овој ентитет, од несрпска националност.
Бошњачките политичари се плашат дека ова е всушност претходница на обидот на РС да се отцепи од БИХ.