СОНК в среда на штрајк, СНП обвинува за манипулација со наставничката фела

Добивај вести на Viber

Најавениот протест на СОНК е чиста манипулација за нашата фела, обвинува Синдикатот на Наставничкиот пленум за најавениот протест закажан за во среда.

СОНК пред Министерството за образование на 17 јануари ќе бара повисоки плати, а од СНП реагираат и нема да дадат поддршка на овој протест.

„Баравме, бараме и ќе бараме унапредување на положбата на наставниците. Но, не со СОНК! Не за личните интереси на рака луѓе во неговата врхушка.“, велат од СНП.

И покрај тоа што сметаат дека барањата на СОНК се легитимни од СНП посочуваат дека протестот е невиден сарказам и обид за нова манипулација со наставничката фела. 

„Сите ние многу убаво знаеме и паметиме каква беше улогата на СОНК претходната деценија. СОНК, на чело со актуелното раководство, без да ги праша наставниците, без да го чуе нивниот глас, го аминуваше срамното екстерно проверување, наводно на знаења, реално како инструмент за пресметка со неистомислениците. СОНК потпиша Колективен договор и ниту еднаш не побара истиот да биде почитуван. СОНК ги премолча заменските наставници! СОНК го аминуваше укинувањето надомест за патни трошоци. Голем е бројот злодела против фелата од страна на СОНК. Затоа ние, наставниците, масовно почнавме да истапуваме од неговите редови. Затоа покренавме иницијатива за формирање синдикат.

Барањата со кои сега излегува СОНК се легитимни. Но, СОНК, особено неговото раководство- не е! Тие луѓе, таа организација, ја потрошија целата наша доверба, целото наше трпение. Ни го поткопаа достоинството, ни ја загрозија егзистенцијата!, а требаше да ги штитат и унапредуваат.“, меѓудругото стои во реакцијата на СНП.