Со нови садници ќе се штити Преспанското Езеро; Донацијата тежи 5 милиони швајцарски франци

Добивај вести на Viber

Со пари од швајцарската Влада, а обезбедени преку програмата на УНДП , Преспанското Езеро ќе се заштитува од ерозија, а околината ќе се пошумува со автохтони дрвја.

Како што информираше директорот на „Македонски шуми“, Жарко Караџоски во првата фаза од проектот предвидено е да се направи современ расадник за автохтони садници на површина од 0,7 хектари во ресенското село Асамати каде ќе се произведуваат по еден милион автохтони дрвја секоја година.

„Од расадникот ќе се пошумуваат сите ерозивни подрачја околу Преспанското Езеро. Во наредните четири-пет години преку оваа соработка ќе ја заштитуваме животната средина и Преспанското Езеро, а тоа ќе има позитивно влијание и врз природата и врз туризмот“, посочи Караџоски.

Според  Александро Фракасети, кој е заменик претставник на УНДП, обновувањето на шумскиот фонд, пошумувањето и спречување на ерозивните последици се неопдодни за заштита на Преспа и околината.

„Главни цели се подобрување на шумскиот фонд во регионот и регулирање на главните порои во тој дел. Со реализација на проектот ќе се намали ерозијата, а со тоа и таложењето во езерото и ќе подобри квалитетот на целиот еко-систем. Со подобрувањето на состојбата на шумскиот фонд ќе се обезбедат вредни живеалишта на биодиверзитетот, ќе се зголемат можностите за производство на дрвена граѓа, ќе се намали емисијата на јаглероден диоксид, а ќе се подобри и квалитетот за живеење во целиот регион“, рече Фракасети.

За проектот за заштита на Преспанското Езеро, обезбеден е буџет од пет милиони швајцарски франци.