Што може да направи Huawei во Македонија по средбата со Заев?

Добивај вести на Viber

Huawei како бренд кој доживува светска експанзија е присутен и во Македонија преку директна продажба на своите производи. Инаку, Huawei го претрка и Apple на второто место по бројот на продадени мобилни телефони и ита кон врвот. Huawei во последните неколку години засилено работи на развој на напредната 5G мобилна мрежа која ќе овозможи лесно поврзување на уредите со Интернет на нештата кои целосно ќе може да се контролираат и следат преку смартфонот, како и да се пренесуваат податоци со неверојатни брзини. 

Huawei доби и поддршка од македонскиот премиер Зоран Заев кој вчера имаше средба со претставници на оваа голема кинеска компанија. 

- Ние имаме голем интерес и желба да го модернизираме нашето општество, за што постои голема мотивација во целата влада. Ова може да биде одлична прилика да го отпочнеме тој процес на едно повисоко рамниште – истакна премиерот Заев на средбата.

Претставници на кинескиот гигант го запознаа премиерот со потенцијалите на компанијата, како на глобално така и на локално ниво, и ја потенцираа подготвеноста да ги имплементираат своите планови и во насока на локалниот развој во земјава, преку инвестициските и иновативни стратегии на компанијата.

Huawei во Македонија може да им огромна улога во обезбедување на технологии за претстојната 5G мобилна мрежа за која скептиците ќе речат дека се уште е далеку, но и самите мобилни оператори се свесни дека тие промени мора да следат што побрзо за да бидеме во чекор со останатите земји.