ШТО ЌЕ ИЗМИСЛИ ЕУ: Европа го стигна лимитот за прием на бегалци

Добивај вести на Viber

Европа е на границата на своите можности да прифаќа бегалци. Ова го изјави претседателот на Европскиот совет, Доналд Туск, повикувајќи ја на помош меѓународната заедница.

Практичната можност на Европа да прифаќа нови бегалци, да не зборуваме за илегалните економски мигранти, е блиску до исцрпување“, изјави тој на прес-конференција во рамките на самитот на Г-20 во кинескиот град Ханчжоу.

Двајцата со претседателот на ЕУ, Жан-Клод Јункер се обратиле пред лидерите на најразвиените земји.

Европските лидери ги повикаа Кина и другите земји од Г-20 да учествуваат поактивно во обидите да се совлада глобалната бегалска криза.

„Миграционата и бегалската криза се глобален предизвик, кој бара глобално решение“, рече Туск. Кина би можела да даде придонес, доделувајќи помош за развој, додаде тој.

Туск изјави дека нема да се водат преговори со Британија за условите за нејзиното излегување од Европската унија, пред Лондон официјално да го активира член 50 од Лисабонскиот договор и да започне со процесот на напуштање, пренесоа американските медиуми. Прелиминарните преговори не се во интерес на преостанатите 27 земји во ЕУ, продолжи Туск.

Јункер рече дека Брисел ќе продолжи да преговара со САД за договорот за трансатлантското трговско и инвестициско партнерство (ТТИП), бидејќи мандатот на Европската комисија да ги води овие преговори останува во сила, пренесе Франс прес.

„Имајќи го предвид мандатот даден од земјите во ЕУ на Комисијата, ние ќе продолжиме со преговорите со САД за договорот што ќе има позитивни ефекти за економијата и вработувањето“, истакна Јункер. Француската и германската влада изразија противење на договорот, потсетува АФП.

Одлуката на Брисел да ја задолжи компанијата Епл (Apple) да и исплати на Ирска над 13 милијарди долари  заостанат долг е базирано на факти и не е насочено против САД, рече Јункер.

„Оваа одлука е јасно заснована на факти. Ние ги применуваме правилата, како што бараат фактите и законите“, истакна тој и потсети дека Епл има корист од незаконски даночни предности обезбедени од Даблин. Би било апсурдно да се избере фискалниот терен за напад против САД, додаде Јункер.

„Треба да ги заштитиме интересите на членовите на ЕУ, кои сакаат да останат заедно, а не на оние кои сакаат да ја напуштат Унијата“, рече тој.