Што изјави напаѓачот на Шеќеринска во судница?
Објавено во: Македонија 06 Октомври, 2017
За виновен се изјасни обвинетиот Панче Ангелов(65) за напад на тогашната пратеничка Радмила Шеќеринска, а сегашна министерка за одбрана, при упадот во Собранието на 27 април. Во Основниот суд Скопје денеска обвинетиот Ангелов изјави дека се чувствува виновен за кривичното дело кое е наведено во обвинителниот акт.
Тој е еден од напаѓачите кои влегоа во Собранието. Ангелов ја повлече за коса Шеќеринска, откако беше удрена со метален статив по глава.
Во обвинението се истакнува дека Ангелов бил во првата група која влегла во Собранието и заедно со најсилните и најнасилните луѓе се упатил директно во прес-салата. Најпрво му упатил закани на лидерот на СДСМ, Зоран Заев, потоа ја нападнал Шеќеринска, а фрлил и шише кон други пратеници. И двајцата се здобиле со тешки телесни повреди.
Претходното рочиште, на 19 септември, беше одложено на барање на адвокатот на Ангелов доделен по службена должност, кој побара време за да се подготви за судската постапка.