Реформаторите од ВМРО-ДПМНЕ одат на избори
Објавено во: Македонија 01 Март, 2020
Граѓанската платформа Македонски концепт синоќа најави учество на предвремените парламентарни избори со свои изборни листи на граѓанскиот собир насловен како „Чекор напред!“, што се одржа во Скопје.
На истиот беше промовиран „Граѓанскиот Манифест“ на Македонски концепт, којшто, како што велат од таму, ги поставува основите и целите на идното политичко дејствување, познато уште по тоа што произлезе од движењето за реформирање на ВМРО-ДПМНЕ.
– Цврсто демонстрираме подготвеност да одиме на избори! Ќе покажеме дека сме уникатна понуда, многу поразлична од досегашните. Нашиот концепт, нашиот македонски концепт, се нови лица, нова генерација, коишто со посветеност, стручност, издржани и свежи идеи, ќе докажат дека заеднички можеме да создадеме држава во којашто граѓаните се секогаш на прво место и која е економски и политички стабилна, најави лидерот Петар Богојески.
Тој најави дека ќе бидат понудени нови идеи и нови проекти кои што ги решаваат проблемите, наспроти личните интереси. Решенијата би биле ефективни и ефикасни, а не политичка импровизација или манипулација, додаде промоторот. Вредностите ќе бидат нормална држава, фер општество, европеизација, деидеологизација, законитост, правдина, политички дијалог…
– Ние нема да прифатиме да бидеме „трета политичка“ опција. Нашата посветеност е да бидеме прва и единствена опција, бидејќи втората не претставува ништо друго, туку мафија или опција кај која доминираат лични и партиски, а не национални и државни интереси. Нашата цел е да создадеме нормална држава! – говореше Богојески.