Од протести на нови преговори меѓу СОНК и Владата
Објавено во: Македонија 17 Јануари, 2018
Конфедерацијата на слободни синдикати остана до крај на своите намери и денес го одржа протестниот марш на кој побара почитување на колективните договори, исплата на регрес за годишен одмор и зголемување на платите во јавниот сектор. Нивниот протест го поддржа и СОНК кои излегоа со свои барања за нивните членови во образовниот сектор за потоа да истакнат дека ќе продолжат со социјалниот дијалог со владата.
- Од министерката за образование и наука добивме ветување дека час поскоро, од понеделник, ќе седнеме и отворено ќе разговараме за сите проблеми кои ги имаме во дејноста образование, така што одлуката за да не започне второто полугодие треба да ја донесе орган, а во овој момент нема потреба за тоа - изјави Јаким Неделков од СОНК.
Неспорно е дека ќе има дијалог меѓу Владата и синдикатите, но во делот за образованието мојот впечаток е дека ние со мерките што ги преземаме одиме дури и пред барањата на синдикатите, изјави министерката за образование и наука Рената Дескоска.
Како пример за мерки кои, рече, со задоволство биле прифатени од наставниците и професорите, е можноста што ја добиле за компензација на работни денови што ги работат во саботите со деновите помеѓу Нова година и Божик.
- Тоа беше прифатено од наставниците со задоволство бидејќи досега, и покрај тоа што тие реално немаа обврски, ги малтерирале да доаѓаат во училиште, да се потпишуваат и да седат. Сите мерки што ги правиме во рамките на реформите ќе дадат бенефит не само за учениците, туку и за наставниците. Мислам дека секој добронамерен учесник во дијалогот - дали се синдикати, пленуми или наставници, би биле задоволни од процесите коишто се почнати - изјави Дескоска по прес-конференцијата на која МОН ги презентираше новите наставни планови за прво одделение.