ОД ПОНЕДЕЛНИК: Приватните специјализанти стапуваат во генерален штрајк
Објавено во: Македонија 11 Април, 2024
Приватните специјализанти најавија дека од понеделник стапуваат во генерален штрајк.
Велат дека ниту едно од барањата кои ги истакнаа на последниот протест здравствените власти не ги исполниле. Штрајкот ќе трае до исполнување на нивните барања.
„За жал бидејќи ги исцрпивме сите механизми со цел да апелираме за решавање на овие проблеми, во координација со приватните специјализанти кои што цврсто застанаа на ставот дека веќе не можат да работат за плата од 26.000 денари, навистина им треба егзистенција се одлучија на последниот законски механизам за остварување на своето право, а тоа е прекин на работниот процес, генерален штрајк што подразбира неизвршување на интервенции, операции, дијагностика и водење на дежурствата“, вели д-р Александра Георгиева од Здружение тона приватни специјализанти.
Од Министерството за здравство велат дека извештај е изготвен и дека на некоја од следните владини седници ќе се разгледуваат можните решенија, со оглед на тоа што било предизборен период.
„Ставот на Министерството е позитивен, со цел да им се излезе во пресрет на приватните специјализанти. По средбата со нив, е изготвен извештај и доставен на Влада, кадешто на некоја од седниците ќе дојде на разгледување со цел да се видат нивните барања и можните решенија во овој предизборен период“, велат од министерството за здравство.
Приватните специјализанти пак велат дека освен ветувањата, не добиле никакви цврсти убедувања дека проблемите ќе бидат решени.