Нестручни фирми прават покриви на згради за евтини пари
Објавено во: Економија 02 Октомври, 2018
Фирми регистрирани првенствено за друга намена се ангажираат од заедниците на сопственици и лиценцирани управители за поправка на дотраени кровови на зградите.
Се работи за фирми со сомнителна стручност на тоа поле и тоа не им е воопшто наведено како дејност во основните регистрирани активности.
- Од куќниот совет добив уплатница за 1.500 денари за поправка на прокиснатиот покрив. Се решив да испитам каква фирма е ангажирана и кога се јавив од таму ми рекоа дека се работи за претпријатие кое првенствено се бави со хигиена, додека поправка на покриви воопшто не ми споменаа. Кога ги запрашав за мојот конкретен случај, од таму ми рекоа дека тие за прв пат ќе работат на поправка на кров - вели Илина К. од скопската населба Буњаковец.
Никола Велковски, поранешен градски архитект на Скопје, по повод на неодамнешното паѓање на доградени покриви од зградите во Скопје по силниот ветер, го прашавме како да се спречат ваквите опасности кои ги загрозуваат и животите на граѓаните.
– И последното невреме во кое ветерот откорна покриви покажа дека тие се голема опасност. Најмногу од причина што во голем број на случаи тие се нестручно направени, без запазување на градежните стандарди. Куќните совети најчесто се водат со логиката таа доградба, која се прави да се спречи протечувањето на рамните покриви, да биде што поефтина оти во зградите тешко оди собирањето пари од станарите за вакви работи. Така, на крајот се ангажираат сомнитeлни фирми кои немаат лиценци за ваков вид градежни работи. Најчесто, тоа се групи граѓани кои како нерегистрирана фирма вршат вакви дограби. На крајот се добива некаков импрoвизиран покрив од неколку греди, летви и ламарини кој при силниот ветер се откорнува и паѓа надолу и може и да убие некого - вели Велковски за Скопско Ехо.
Така, често има случаи во кои се направени покривите а за кои никој не гарантира дека се сигурни. Надлежните урбанистички органи би требало да ги проверат дали се изградени според стандардите. Вака, при секое невреме ни се случува паѓање на покриви.