Нема слободен кревет во главната српска ковид болница
Објавено во: Балкан, Корона Вирус 31 Март, 2021
Teшка е состојбата во Србија, каде нема слободен кревет во главната српска ковид болница.
Државните секретари во Министерството за здравство одржаа состанок со раководството на главната ковид болница во Батајница, Србија, по повод епидемиолошката состојба во земјата. Директорката Татјана Аџиќ Вукичевиќ, по состанокот изјави дека „ова е најтешкиот момент во работата на болницата”. Во моментот во неа има 915 пациенти. Таа оцени дека ова е пресвртница за функционирањето на здравствениот систем во Србија. Вчера директорот на белградската Клиника за инфективни болести, Горан Стевановиќ, предупреди дека во болниците има места за само уште 24 часа. Од 25 декември кога започна имунизацијата во Србија, дадени се повеќе од два и пол милиони вакцини и според денешните податоци 1.005.909 милиони граѓани се ревакцинирани. Во изминатите 24 часа во Србија починаа 38 лица, а од тестираните 17.801 примерок беа потврдени 5.107 нови случаи на инфекција со коронавирус.