На стари горива од пет милиони литри во Македонија им поминува рокот
Објавено во: Економија 15 Јануари, 2020
Во два склада во Македонија нафтени деривати од пет до шест милиони литри не се променети повеќе од четири години, а Државниот завод за ревизија бара од Дирекцијата за нафтени резерви да ја пушти во промет бидејќи ги губи хемиско-физичките својства.
Ова го констатира државниот ревизор во својот најнов извештај, а директорот на дирекцијата, Уљуси Бекири, вели дека се работи за количина од пет до шест милиони литри. Дирекцијата ја превземала одговорноста за складовите откако еден од приватните складиштари се откажал од таа дејност во 2014, а од 2015 не дошло до размена на ново со старо гориво.
- Според препораките од лабораторијата која ја врши контролата, имаме време до крајот на оваа година. Едната опција за која сме во преговори со „Окта“ е таа да се превземе од нивна страна и да се дислоцира, а втората е истата да се продаде, за што ќе се размислува по јануари бидејќи најпрво треба да се донесе планот за јавни набавки за 2020, вели Бекири.
Директорот на Дирекцијата за нафта и нафтени резерви додава дека со новата владина уредба на приватните трговски друштва - складиштари им се плаќа за чувањето на нафтата и, според тоа, ќе има интерес од нивна страна да се надмине овој проблем.
Инаку за ова Фактор пишуваше уште лани, кога никој не зборуваше за недостатокот.
Приватните складиштари имаат обврска да вршат обновување на залихите заради зачувување на хемиско-физичките својства на резервите. Двата склада се во сопственост на државата, од кои за едниот право на користење има Министерството за одбрана додека другиот Агенцијата за стокови резерви.
Дирекцијата за нафтени резерви ја известила Владата дека старата нафта треба да се замени уште во 2018, по што дури во мај 2019 со законси измени се обезбедува можност за нејзино заменување кое не е направено до денес.
Двата склада се наоѓаат во Куманово и Гостивар. Од дирекцијата го известиле ревизорот дека се земени мостри за да се испита квалитетот на екстра-лесното масло и Еуросупер 95, при што за првиот случај во објаснувањето се вели дека нема губење на својствата, а за другиот се уште се чекаат резултатите.
Александар Кузмановски