ММФ ги обнови стравувањата за „Grexit“

Добивај вести на Viber

Меѓународниот монетарен фонд (ММФ) ја врати во фокус можноста за излез на Грција од еврозоната (Grexit). Причината за овие проблеми е недостатокот на реформи - главно во пензискиот систем, и на олеснети услови за заеми на Атина.

Тоа го коментира на блогот на ММФ шефот на одделот „Европа“ во ММФ Пол Томсон.

Без промена во пензискиот систем Грција нема да може да постигне вишок од 3,5% од бруто домашниот производ до 2018 година, цел на која се согласи во третата спасувачка програма нашиот јужен сосед.

Томсон е категоричен дека намалувањето на пензиите е неизбежно и покрај барањата на премиерот Алексис Ципрас, дека тоа е „црвена линија“, од која грчката влада нема да попушти.

„Зошто фокусот е на пензиската реформа?“, пишува уште Томсон, кој во моментов е задолжен за програмите на Грција и Португалија, на блогот на Фондот. Тој наведува дека во номинален однос пензиите во Грција и во Германија се речиси идентични. Во исто време платите на Германците се речиси два пати повисоки од грчките.

Тоа значи дека за да биде покриен дефицитот во пензискиот систем, на Грција ќе и требаат многу повеќе средства отколку просекот во ЕУ - 10% од БДП, додека просекот на ЕУ е 2,5%. „Очигледно ова е неодржливо развој“, посочува уште експертот.

Многу од трошоците со кои кабинетот сака да го замени намалувањето на пензиите, веќе е „намалено до коска“ и обидите во таа насока ќе имаат многу ограничен ефект. Во исто време Томсон не поддржува и идеи за зголемување на даноците, за да бидат задржани социјални плаќања и големината на пензиите во земјата.

Плановите за пензиски реформи, иако и без намалување на пензии, предизвикаа сериозни протести во Грција. Едни од најактивните се фармерите, за кои освен зголемено осигурување Владата подготвува и зголемување на даноците.

Земјата денес е парализирана поради блокади на патиштата, а се планираат и масовни протести во Атина. Околу три илјади фармери од Крит пристигнале со бродови на пристаништето Пиреа, за да се вклучат во планираните протести во грчката престолнина.

„Катимерини“ веќе соопшти за ескалација на тензиите пред Министерството за земјоделство во Атина - земјоделците фрлале домати и камења врз зградата, а полицијата одговори со солзавец.