Мицкоски: Можното формирање на нови партии е нарачка на Заев

Добивај вести на Viber

Христијан Мицкоски, лидерот на ВМРО-ДПМНЕ, во вестите на Алфа ТВ тврди дека новите десничарски партии кои би се формирале а во нив би фигурирале личности како Митко Јанчев, Никола Тодоров и Петар Богојески се по нарачка на СДСМ и премиерот Зоран Заев.

Во ексклузивно интервју за Фактор, градоначалникот на Кавадарци, Митко Јанчев, денеска вели дека не сака да го погази или да го збуни членството, но смета дека ако партијата не се вразуми и не ја смени политиката и реториката, се остава простор да се формира нова партија, во која и тој би учествувал.

„ВМРО-ДПМНЕ е обединета. Последните резултати од претседателските избори тоа го покажуваат, но истовремено легитимна е желбата на власта, на СДСМ и на Зоран Заев да прават еден вид проблеми во рамките на опозицијата и тоа е една легитимна постапка. Така што сетоа она што би значео атомизирање и тоа било какво па дури и во рамките на некои незначителни процеси во случајов му одговара само на СДСМ и ЗОран Заев. 

Јас сите оние што сакаат да ги презентираат своите мислења ги повикувам, тоа често пати го правам на настаните и на моите јавни говори да дојдат, да разговараме, да ги слушнеме аргументите, но да бидат подготвени да ги слушнат и нашите аргументи. Да сумирам, атомизирање на процеси во рамките на ВМРО-ДПМНЕ во овој случај му одговара само на СДСМ и Зоран Заев, а тоа е легитимна битка и за тоа, претпоставувам, му се потребни определени луѓе за таа нарачка“, рече Мицкоски од Ресен.

Дополни дека наскоро ќе го прошири тимот од 16 стратешки соработници кои ги именува вчера а меѓу нив се најдоа Гордана Силјановска Давкова, Сашко Кедев, Игор Дурловски, Борко Ристовски и Александар Климовски.

„Тимот од 16 стратешки соработници ќе се проширува во периодот што ќе следува. Ова се врвни професионалци а она што не поврзува со тие родољуби е патриотизмот и желбата да се приклучат кон „Обновата за Македонија“. Тоа се врвни личности со голема желба, со голема мотивација, со голема посветеност прифатија да бидат мои советници.

Директно ќе бидат вклучени во изработката на визијата, стратегијата, плановите, новите политики на ВМРО-ДПМНЕ и коалицијата, а во иднина тоа ќе биде преточено во политики на идната Влада која ќе ја формираме“, наведе Мицкоски.