МАКЕДОНЦИТЕ ОД ДИЈАСПОРАТА ПРОТЕСТИРАА: Кои се нивните пет барања содржани во Декларацијата?
Објавено во: Македонија 15 Јануари, 2018
Поради спорот со Грција и Законот за употреба на јазици, движењето „Ние сме Македонија“, организирано од повеќе Македонски организации од дијаспората вчера одржа протест пред Македонската амбасада во Вашингтон.
Тие сметаат дека Законот за употреба на јазици е противуставен. Протестот траеше еден час. Македонците од Вашингтон, Мериленд, Вирџинија и Њу Џерси покажаа загриженост за најновите случувања во земјава.
Протестот започна со интонирање на македонската химна, по што со пароли и слогани ја искажаа својата загриженост за политичките настани во Република Македонија.
На Амбасадорот на Република Македонија во САД, Васко Наумовски, му беше предадена Декларација во која се наведени 5 барања до Претседателот на Република Македонија, Владата на Република Македонија и Собранието на Република Македонија.
„Итен прекин на разговорите околу името на државата што Владата на Република Македонија ги води во тајност под покровителство на ОН, и неменување на уставното име Република Македонија, и поднесување резолуцијата во Генералното Собрание на ОН за признавање на истото.
Ставање вето од страна на Претседателот на државата на противуставниот закон за јазици, и повлекување на истиот од понатамошнен процес во Собранието на Република Македонија.
Oрганизирање попис под мониторинг на реномирана меѓународна организација на територијата на Република Македонија во период не подолг од 6 месеци од приемот на оваа декларација.
Неменување на историјата на Македонија, статусот на МПЦ – ОА и интензивирање на грижата за Македонците во соседните држави.
Доколку Владата на Република Македонија не е способна да го стори горенаведеното, тогаш повикуваме на итно самораспуштање на Собранието на Република Македонија и организирање на непосредни избори каде што и на македонските граѓани од дијаспората ќе им бидат овозможени свои претставници во новиот парламентарен состав, според принципот на пропорционалност“- се барањата што ги упати Движењето.
Следниот протест ќе се одржи задутре на 17-ти јануари, пред Обединетите Нации во Њу Јорк. Токму на тој ден медијаторот Метју Нимиц ќе има средба со преговарачите за името, Васко Наумовски и Адамантиос Василакис.