Костовски: СДСМ ги враќа долговите кон криминалците на штета на граѓаните и државата
Објавено во: Македонија 15 Јануари, 2018
Дарко Костовски од ВМРО-ДПМНЕ вели дека со доаѓањето на власт на Зоран Заев, дојде живот, но не за граѓаните туку за криминалците.
Тој вели дека со новиот Закон за амнестија СДСМ ги враќа долговите кон криминалците на штета на граѓаните и државата.
„Сите деструктивни политики на кои што предупредувавме пред избори се исполнуваат. Државата се разорува и на економски, и на безбедносен и на политички план. СДСМ денеска реши да ослободува криминалци ,истовремено, кога судиите политички им се одмаздуваат на уметници, оперски пејачи, глумци, режисери само заради нивниот патриотизам“- рече Костовски од ВМРО-ДПМНЕ.
Од опозицијата обвинија за политички реваншизам, за отсуство на правда и селективна правда.
Додаваат дека законот беше донесен на шверцерски начин без присуство на ВМРО-ДПМНЕ.
Со Законот за амнестија се предвидува околу 670 луѓе целосно да бидат ослобоени од издржување на затворската казна, а повеќе од 3000 да добијат намалување на казната за 30 проценти. Со овој закон не се опфатени осудени за убиство, кривични дела против изборите и гласањето, за силување, педофилија, посредување или проституција, дела против државата, злосторничко здружување и кривични дела против човештвото и меѓународното право. Амнестијата не се однесува и на лицата кои кривичните дела ги сториле после 20 септември минатата година.