Колку пари направија лани „Макпетрол“ и „Лукоил“?
Објавено во: Економија 03 Јули, 2018
Големи обрти за мали профити. Генерално тоа е описот во една реченица за продажбата на мало со нафтени деривати. „Макпетрол“ има три пати поголем приход од „Лукоил“ и два и пол пати поголем профит, во апсолутни бројки. „Лукоил“ има подобра продуктивност затоа што има подобар сооднос добивка/вкупен приход
Двете најголеми компании за малопродажба на нафтени деривати „Макпетрол“ и „Лукоил“ лани имале вкупни приходи од речиси 400 милиони евра, покажуваат официјалните податоци на двете компании. Најголем дел од ове пари се направени од продажба на мало на нафтени деривати на околу 200 бензински пумпи ширум земјава. Две третини од вкупниот приход го направил „Макпетрол“ (неконсолидиран финансиски извештај) односно 301,2 милиони евра, а „Лукоил“ има приход од 96,2 милиони евра.
Од достапните податоци се гледа дека растеле приходите, но и расходите и кај двете компании, но „Макпетрол“ лани работел поангажирано на одржување и на зголемување на своето пазарно учество, но книжи пад на добивката. „Лукоил“ пак иако има пад на добивката во однос на 2016 година има подобар коефициент добивка наспроти вкупни приходи. „Макпетрол“ има 127 бензински станици, а „Лукоил“ оперира на 29 станици. Доколку се прави просек на приход по бензинска станица „Макпетрол“ лани имал околу 2,4 милиони евра, а „Лукоил“ 3,3 милиони евра.
Трошоците на „Лукоил“ растеле повеќе од неговите приходи
„Лукоил“ лани на своите 29 бензински пумпи направил приход од 96,2 милиони евра и тоа е за 7 милиони евра односно 7,7 отсто повеќе од 2016 година. Наспроти тоа за поголем износ пораснале неговите расходи. Имено тие лани биле 93,83 милиони евра и пораснале за 8,7 отсто односно за 7,5 милиони евра. Добивката на „Лукоил“ паднала за околу 550.000 евра односно за 20 отсто во однос на 2016 година. Лани таа изнесувала 2,09 милиони евра. Важно е да се истакне дека и покрај тоа „Лукоил“ има подобар сооднос на добивка во однос на вкупни приходи од „Макпетрол“ и профитот изнесува 2 отсто од вкупните приходи. Кај „Макпетрол“ профитот е 1,7 отсто од вкупниот приход. Обврските на „Лукоил“ лани пораснале за 1,64 милиони евра до ниво од 8,47 милиони евра.
„Макпетрол“ со зголемени приходи и намалена добивка
Најголемата домашна компанија за трговија на мало со нафтени деривати на своите 127 станици има добивка од 5 милиони евра која е 1,6 отсто од вкупниот приход што изнесува 301,2 милиони евра. Добивката лани во споредба со 2016 година паднала за 1,22 милиони евра. Неговите приходи пораснале за 37,2 милиони евра, а расходите за 38,2 милиони евра. Обврските на „Макпетрол“ лани пораснале 4 милиони евра и изнесувале 63,5 милиони евра на крајот на минатата година.
Р. Ф.