Колку пари месечно не чинат трите комисии од договорите со Бугарија и Грција?
Објавено во: Економија 25 Октомври, 2021
Трите комисии кои произлегоа од Преспанскиот договор и Договорот за добрососедство месечно не чинат нешто повеќе од 20.000 евра, покажуваат исплатите кои одат преку Министерството за надворешни работи на алатката за пребарување „Отворени финансии“.
Се работи за Заедничкиот интердисциплинарен комитет на експерти за историски, археолошки и образовни прашања, Комисијата за историски прашања со Бугарија и Комисијата за трговски марки со Грција. За последните две имаше и медиумски натпис дека се истечени договорите со МНР и дека треба да се разговара за нови.
Станува збор за 20-ина исплати месечно, од кои повеќето се точно по 1.000 евра, додека двајца координатори имаат месечен хонорар од 74.000 денари. Најстарите месечни исплати на некои од членовите датираат уште од втората половина на 2018, односно до сега станува збор за 30-тина хонорари.
Трите комисии повремено, најчесто поради субјективни причини, го менуваат својот состав, па така минатата недела, по три години работа, се повлече историчарот Ванчо Ѓорѓиев од Заедничката мултидисциплинарна експертска комисија за историски и образовни прашања меѓу Република Македонија и Република Бугарија.
Од македонската страна на комисијата соопштија дека се затекнати од ваквиот потег на Ѓорѓиев и дека предлозите кои нему не му се допаднале не го нарушуваат македонскиот идентитет, национални интереси и црвени линии усвоени во Собранието.
На платениот список на Министерството за надворешни работи е и поранешниот премиер Владо Бучковски, кој како именуван специјален претставник за Бугарија има месечен хонорар од 60.000 денари, покажува алатката „Отворени финансии“ и тој годинава веќе има десет исплати.
А.К.