Колку дивиденда бара еден голем акционер во „Македонијатурист“?

Добивај вести на Viber

Ќе се разберат ли оваа година големите акционери во „Македонијатурист“? НЛБ Нов пензиски фонд друштвото кое управува со 41.863 акции во хотелиерската компанија втора година по ред бара многу повисока дивиденда од таа што ја нуди акционерската екипа  која има мнозинство. Бараат и откуп на сопствени акции по цена од 3.750 денари до 5.850 денари, но што ќе добијат?

Втора година по ред друштвото кое управува со пензиските фондови „Нов пензиски фонд“ предлага две точки на дневниот ред за претстојното акционерско собрание на „Македонијатурист“. Првата точка е да се подели бруто дивиденда од 380 денари, а втората е да изврши откуп на сопствени акции иако не е наведено колку акции да бидат предмет на откуп ниту пак сума што е планирана за откуп.

Овие предлог одлуки ќе се најдат на гласање пред акционерите на компанијата на претстојното акционерско собрание закажано за 23 април. Предлагачи се двата пензиски фонда кои заедно поседуваат 41.863 акции со право на глас во „Македонијатурист“ со што е исполнет законскиот услов предлагач кој поседува макар и 5 отсто од акциите да постави точка на дневен ред на претстојното акционерско собрание. 
За потсетување, и лани за прв пат овој акционер достави точки со слична содржина на акционерското собрание. Но тие не поминаа на гласањето односно не добија поддршка од поголемиот број на присутни акционери на собранието. 
Предлагачот, во врска со предлогот за откуп на сопствени акции смета дека не е проблем тоа што „Македонијатурист“ веќе поседува 10 отсто сопствени акции согласно со членовите 335 и 336 од ЗТД затоа што тие акции можат да бидат поништени или продадени во предвидениот рок. Во нивниот предлог не е наведен број на акции кои треба да се откупат ниту сума за откуп. Наведено е само дека ценовната маргина за откуп треба да се одреди од 3.750 денари најниска цена до 5.850 денари како највисока цена. Неизвесно е како за овој предлог ќе се изјаснат мнозинството акционери во „Македонијатурист“ кои ќе бидат присутни на акционерското собрание.

Во врска со предлогот за дивиденда од Нов пензиски фонд треба да се каже дека тоа е втор предлог што ќе биде ставен на дневен ред и се разликува од предлогот што беше поддржан од најголемите акционери кој изневаше исплата на дивиденда во износ од околу 180 денари за акција. Во нивното образложение предлагачите образложуваат дека со поделба на овој износ на дивиденда нема да биде загрозено работењето на „Македонијатурист“ затоа што компанијата има високо ниво на ликвидни средства над 20 милиони евра кои ги чува во депозити, а при тоа нема никаква задолженост или кредитна изложеност.