Кога Владата ќе расправа за предлог буџетoт за 2018 година?
Објавено во: Економија 09 Ноември, 2017
Подготвениот предлог буџет за 2018 година e ставен на дневен ред на седница на Владата која ќе се одржи доцна попладнево.
Предлогот буџетот за 2018 година е проектиран на 211,7 милијарди денари или 3,44 милијарди евра. Приходите се планирани на 193,5 милијарди, а буџетскиот дефицит на 18,2 милијарди денари или 2,7 проценти од БДП. За капитални расходи се предвидени 24,7 милијарди денари, а во предложениот буџет има средства и за повисоки плати во образованието, здравството, за зголемување на пензиите, односно нивно усогласување со трошоците на живот.
Најголем дел од расходите се наменети за пензии, социјална и детска заштита со 32 отсто од вкупните расходи, 19 процнети се наменети за економски развој и финансиски работи, 14 отсто за здравство, 11 проценти за образование, наука и спорт, по пет проценти за градежништво, транспорт, комуникација и екологија, земјоделство и јавен ред и безбедност, три проценти за одбрана, по два отсто за надворешни работи и ЕУ интеграција и култура, и по еден отсто за судство и регионален развој.
Платите се проектирани на 27,1 милијарди денари и има раст од 460 милиони денари заради повисоките плати за сите припадници на АРМ, нови вработувања во детските градинки, како и зголемувањето на платите во здравството, образованието и во градинките за пет проценти кое е планирано со септемвриската плата во 2018 година.
Предлог-буџетот беше претставен пред синдикатите, стопанските комори и невладиниот сектор.
Читајте уште
Кој сектор ќе добие најмногу, а кој најмалку со новиот буџет?