Ќе се стегнат ли веледрогериите при паралелен увоз?
Објавено во: Македонија 05 Јануари, 2018
Една од најжешките теми во изминатиот период која фрли огромен сомнеж во јавноста е адресирана и од Владата со тоа што веќе е изготвен нов закон со кој ќе се „стегнат“ веледрогериите при паралелен увоз на лекови за поголема контрола на нивниот квалитет и состав, како и за висината на цените.
„Владата денеска го разгледа и утврди новиот текст на Предлог-законот за изменување и дополнување на Законот за лековите и медицинските средства, со одлука да го достави до Собранието на Република Македонија согласно член 137 од Деловникот на Собранието на Република Македонија.
Со предложените решенија веледрогериите се задолжуваат да обезбедат пообемна документација која се однесува на квалитетот на лековите кои се предмет на паралелен увоз.
Дополнително со овој предлог-закон се прецизира начинот на издавање на одобрението за паралелен увоз во смисла на утврдување на критериуми и тоа со обезбедување Сертификат за квалитет на лек што e предмет на паралелен увоз, приложен во оригинал. Сертификатот за квалитет треба да биде издаден од страна на производителот на лекот или од лабораторија овластена од надлежен орган на земјата производител или од земјата извозник на лекот.
На овој начин се овозможува подобрена контрола на квалитетот на секоја серија од лековите кои се предмет на паралелен увоз и се обезбедуваат безбедни лекови од паралелен увоз и заштита на пациентите од евентуални неквалитетни лекови“, соопштија од Владата на Република Македонија.
Паралелниот увоз беше воведен со цел да се намалат високите цени на одредени лекови во Македонија, но потоа во прашање беше доведен целиот систем на контрола при што беа пронајдени и лекови фалсификат пуштени во продажба за што допрва ќе се води поголема истрага, а во тек се и неколку судски процеси.