ЌЕ ИМА ЛИ ВЕТО: Иванов утре треба да се изјасни за Законот за јазици
Објавено во: Македонија 17 Јануари, 2018
Утре на полноќ истекува рокот во кој шефот на државата, Ѓорѓе Иванов треба да одлучи дали ќе го потпише указот за прогласување на Законот за употреба на јазиците или ќе го врати во Собранието со или без забелешки.
Пратениците во Собранието го изгласаа Законот за употреба на јазиците на 11 месецов, а потоа текстот беше испратен во кабинетот на Иванов.
Во редовното годишно обраќање во Парламентот Иванов кажа дека законот е неуставен и претставува закана по унитарноста на државата.
Ако Иванов одлучи да не го потпише указот за прогласување на законот, во тој случај, според членот 75 од Уставот на Република Македонија, Собранието повторно го разгледува законот и доколку го усвои со мнозинство гласови од вкупниот број пратеници, а претседателот е должен го потпише указот. Претседателот е должен да го потпише указот и доколку законот се донесува со двотретинско мнозинство гласови од вкупниот број пратеници.