Како МБПР ќе дава поевтини кредити и ќе ги стимулира компаниите?

Добивај вести на Viber

На македонските компании им треба голема поддршка како од приватните банки, така и од страна на државните тела за раст на извозот и зголемување на конкурентноста со што ќе се освојуваат нови пазари, БДП ќе расте, а ќе се отвораат и нови работни места со компатибилни плати. За таа цел Владата планира да преземе неколку чекори за кои на вчерашната седница ги донесе и првите одлуки, при што во фокусот е ставена Македонската банка за поддршка на развојот и нејзиниот ангажман со приватниот сектор во Македонија. 

„Владата на Република Македонија, на 62 седница, го разгледа и усвои Полугодишниот извештај за износот и бројот на одобрени кредити од Посебниот кредитен фонд (ПКФ), структурата по банки учеснички, како и состојбата на салдото, и го овласти д-р Драган Тевдовски, министер за финансии, со Македонска банка за поддршка на развојот АД Скопје (МБПР) да потпише Анекс кон Договорот за администрирање на Посебниот кредитен фонд бр.51-422/1 од 21.01.2011 година склучен меѓу Владата на Република Македонија и МБПР.

Со Анекс на Договорот склучен со МБПР ќе се намали каматната стапка за банките учеснички од 3% фиксно годишно на 2% фиксно годишно, ќе се намали каматната стапка за крајните корисници од до 8% годишно на до 5% годишно, ќе се зголеми максималниот рок на отплата на кредитите од 8 на 10 години и ќе се овозможи пласирање на кредити со намена и само за обртни средства со рок на отплата до 3 години со вклучен грејс период до 6 месеци и со тоа ќе се обезбеди поголема поддршка на  развојот од страна на Банката.

Како дополнителен заклучок, Владата ја задолжи Македонска банка за поддршка на развојот АД Скопје да подготви Стратегија за зголемување на капацитетите за финансирање на македонски компании, со поконкурентни цени и услуги, како и подобрување на условите за осигурување на извозот на македонски производи и во рок од 15 дена да ја достави до Владата“ соопштија од Владата. 

Основна задача на МБПР е токму да го поттикне извозот на македонските компании преку соодветни кредитни линии, како и поддршка за развој на малите и средните претпријатија.