КАДЕ ШТО Е НАЈГОЛЕМ ЗАГУБАР, ТАМУ МУ „ВИСАТ“ И СУДСКИ СПОРОВИ ОД 2,5 МИЛИОНИ ЕВРА - што открија државните ревизори за МЖ Транспорт
Објавено во: Економија 29 Јуни, 2022
Државниот завод за ревизија го објави ревизорскиот извештај за Железници Транспорт, со кој се дава мислење за работењето на оваа државна компанија за 2020 година.
Ревизорите констатирале дека пресметката на платата за вработените не е согласно законските и подзаконските акти.
Дел од наодите на ревизорите се и дека ова друштво во државна сопственост постојано прави годишни загуби од работењето, но и дека има недоволно средства на годишно ниво за субвенционирање на трошоците за патнички сообраќај од Буџетот на земјава, како услуга од јавен интерес.
Оваа компанија која е вечен загубар, може да влезе во уште поголема дупка, бидејќи ја тужат за голема сума пари од различни страни, и тоа на вкупна сума од дури 2,5 милиони евра, па доколку ги изгуби споровите, состојбата може да биде уште понеповолна.
„Судските постапки кои се во тек, а во кои тужена страна е МЖ Транспорт се на износ од 154.018.000 денари (2,5 милиони евра - н.з.)“, се вели во извештајот на Државниот завод за ревизија.
Потоа, констатирано е и дека е нереално проценета вредноста на активата, а со посебен акт не е утврден ниту начинот на вршење попис и тој не е целосно спроведен заклучно со испитуваната, односно 2020 година.
Исто така, ревизорите откриле и дека необјектибвно се искажани позициите за краткорочни побарувања од купували и краткорочни обврски кон добавувачи.
И, она што исто така е многу битно, уловени се и недоследности во постапките за доделување договори за јавни набавки.
Н.Н.Ф.