Груби: Несреќни изјави од челници на државни институции за рамковните вработувања

Добивај вести на Viber

Првиот вицепремиер Артан Груби ја оцени изјавата на Стојко Пауновски како „несреќна“ откако директорот на Државниот пазарен инспекторат реле дека за него се неприфатливи 35-те „рамковно“ вработени кои доаѓаат од Министерството за политички систем и односи меѓу заедниците.

„650 луѓе се започнати со работа и се на нивните работни задачи секојдневно. Има некои несреќни изјави на челници на државни институции, но мислам дека и тие ќе се решат. Значи, нема отпор за примање на К5-административци“, рече денеска Груби при увид на изградбата на дел од автопатот Скопје - Блаце.

Вчера Пауновски на прес-конференција на Инспекцискиот совет рече дека не може да се најдат соодветни работни места за 35-те вработени кои беа распределени во Државниот пазарен инспекторат (ДПИ),

Пауновски, одговарајќи на новинарско прашање, рече дека овие службеници кои досега не одеа на работа а земаа плата бараат да бидат вработени во три града во западниот дел од земјата, а ДПИ има потреба од инспектори на истокот. Освен тоа, сите тие 35 лица не ги задоволуваат критериумите да бидат инспектори.

Министерот за информатичко општество и администрација, Јатон Шаќири, минатата недела информираше дека досега се завршени процедурите во сите институции за сите вработени кои беа предвидени со К5 програмата. Односно, станува збор за околу 1.300 вработени кои беа вработени според Рамковниот договор, и за кои неодамна се донесе закон да мора да се распределат по соодветните државни институции, со таканаречената К5 програма.

„Важно е да се истакне дека најголем број од вработебните врз основа на оваа програма веќе почнаа со работа во соодветните институции. До МИОА не пристигна ниту еден допис од ниеедна институција која одбила да ги трансферира кај неа тие вработени. Од комуникацијата со Министерството за политички систем знаеме дека овој процес се ближи до крајот. Значи, нема никој што не ги прифаќа тие вработени“, рече Шаќири на прес-конференцијата.