Грција стави клуч на вратите на турски училишта
Објавено во: Балкан 19 Септември, 2016
Недостатокот на деца од малцинствата во Грција ги принуди властите да затворат 60 училишта, од кои 9 се турски. Со решение на грчкото Министерство за образование се намалува драстично бројот на часови по турски јазик во две гимназии во Ксанти и Комотини, а недостатокот на доволно ученици предизвика затворање на 9 турски училишта, што предизвика остра реакција на Турција
Претседателот на Здружението на наставници во регион Родопи - Еврос Салих Ахмет изјави дека затворањето или спојувањето на училишта на малцинствата без тоа да е усогласено со родителите на децата е погрешен, бесмислен и неприфатлив чин.
“Со почетокот на новата учебна година изгубивме 9 наши училишта и ние сме силно вознемирени од овој факт. Затворањето на училиштата не е решение за проблемот со образованието на малцинствата. Долг на целата наша заедница е да ги сочуваме средините каде што го изучуваме јазикот и религијата, целта ни е нашите деца да добијат подобро и квалитетно учење. Досегашниот тренд на затворање и спојување на училиштата не го подигна квалитетот на образованието и е грешка тоа да се аргументира со економски и други причини“, коментира Ахмет. Тој истакна дека учебниците по грчки и турски јазици не ги задоволуваат потребите на модерното образование и повика за што е можно побрза замена со нови.
Проблемите на турското малцинство во Грција Ахмет го изложил во извештај до грчкото Министерство за образование. Учителот по турски јазик и литература во гимназијата за малцинствата во Ксанти Садетин Шакир Хусеин изјавил дека турското малцинство има потреба од посебна зграда за учење на децата од средниот курс и средно училиште, како и од уште професори по турски. Според него и во Ксанти, и во Комотини средношколците се соочуваат со многу тешки услови во образовниот процес.