(ФОТО) СРБИТЕ НАПРАВИЈА КАМП: Во шатори ќе ги сместуваат повратниците од ризични земји
Објавено во: Балкан, Корона Вирус 19 Март, 2020
Србија отвори камп за карантин на српски државјани кои се враќаат од странство.
Во Моровиќ, кај Шид, денеска е отворен камп за сместување на државјаните на Република Србија кои се враќаат од странство, а кои немаат регистрирано место на живеење на територија на земјата.
Ова ќе важи и за сите други патници за кои лекарите на границите ќе оценат дека преставуваат ризик по здравјето, објави српското Министерството за одбрана.
Министерството за одбрана заедно со Министерството за внатрешни работи и релевантните санитарни служби ќе утврдуваат кој ќе влезе во кампот, според проценките на лекарите, јави дописникот на МИА од Белград.
Воената установа Моровиќ, Шид и Миратовачко Поле – се трите локации кои се одредени за сместување во карантин, каде ќе бидат испратени српските граѓани кои живеат и работат во странство, а кои доаѓаат од најризичните земји – Италија, Швајцарија, Шпанија и Австрија.
Србија е во вонредна состојба, а на сила е и полициски час, така што движење нема за граѓаните од 20 до 5 часот наутро.Во Србија има 103 случаи на коронавирус, соопшти вечерва српскиот претседател Александар Вучиќ. Поради оваа причина утре Србија целосно ќе ги затвори границите.
Фото МО на Србија