ФОКУС НА ДЕНОТ: Мизрахи разрешена, Законот за ЈО останува за утре
Објавено во: Македонија 15 Февруари, 2020
Собранието рано утрово ја разреши Рашела Мизрахи од функцијата министер за труд и социјална политика.
Таа е разрешена со 62 гласа „за“ и 26 „против“.
Мизрахи во говорот пред разрешувањето рече дека не го прекршила Уставот.
Техничкиот премиер, Оливер Спасовски го тврдеше спротивното и тврдење дека таа со своите активности нанела штета на граѓаните и државата.
Двајца убиени има во грабеж на казино на патот Скопје – Блаце, објави Прес24.
Четири маскирани лица вооружени со автоматско оружје, калишникови, влегле да го ограбат казиното. Убиле еден од вработените како обезбедување и уште едно лице кое во моментот играл на слот апарат.
Францускиот претседател Емануел Макрон изјави дека ќе им овозможи на Северна Македонија и на Албанија да ги почнат разговорите за пристапување во Европската унија доколку следниот месец извештаите на Европската комисија за двете земји бидат позитивни, јави Ројтерс.
Макрон ова го изјави на 56. Минхенска безбедносна конференција, со што навестува дека ќе го одмрзне напредокот на двете балкански земји кон членството во ЕУ и ќе ги увери другите европски лидери дека Франција сè уште го поддржува проширувањето на ЕУ.
Уште еден Македонец е заразен со коронавирус.
Се работи за македонски државјанин кој е во Франција. Ова го потврди министерот за здравство, Венко Филипче. Уверува дека состојбата е стабилна и кај двајцата македонски државјани, затоа што претходно имаше уште еден Македонец на крузер во Јапонија заразен со коронавирус.
„Здравствената состојба на нашиот државјанин, кој се наоѓа во болница во Јапонија е стабилна. И покрај тоа што е позитивен на корона-вирус, неговата клиничка слика е навистина лесна и тој е во добра здравствена состојба, нема некакви посериозни ризици. Во иста стабилна здравствена состојба со слична лесна клиничка слика е и нашиот државјанин во Франција”, вели Филипче.
Пратениците утре ќе гласаат за Законот за ЈО, Советот на јавни обвинители и за Законот за одбрана.
Откако беше исцрпена листата на пријавени за збор на 135 собраниска седница за Предлог-законот за изменување и дополнување на Законот за советот на јавни обвинители, спикерот Талат Џафери констатираше дека општиот претрес по предлог-законот е завршен.
По завршувањето на 135 седница, пратениците веднаш ја почнаа 123. седница, на која на дневен ред беше ставен Предлог-законот за изменување и дополнување на Законот за одбрана, но по исцрпувањето на листата пријавени за збор и за овој закон, претресот беше завршен, а гласањето закажано исто така за утре во 11 и 30 часот.
Се очекува утре да се распушти Собранието.