Фирмите во Европа ја намалија наплатата на фактурите за три дена, македонските каскаат

Добивај вести на Viber

Во Европскиот извештај за наплата од 2018 година корпоративните трансакции покажале дека просечното време за наплата на претпријатијата на своите фактури изнесува 34 дена, што е намалување за три дена во споредба со Извештајот од 2017 година. 

Во Македонија, Народната банка се уште не го објави Извештајот за финансиска стабилност за 2017 година каде што се објавува и просечниот број на денови на наплата на побарувањата, но до 2016 година тој податок се движеше околу 120 дена, што е речиси четири пати повеќе отколку европскиот просек. Просечниот рок, пак, за исплата на краткорочни обврски кај приватните компании во Македонија е дури 179 дена.

Од Стопанската комора на Македонија исто така, за Капитал, велат дека состојбата со наплатата на побарувањата не се подобрува ниту годинава а нивната последната анкета од минатата година, покажува дека дури 40% од анкетираните бизнисмени одговориле дека плаќањата се вршат подоцна од договорените рокови и најчесто надминуваат 90 дена.

Последниот Извештај за финансиска стабилност на Народната банка покажа и големи разлики меѓу компаниите што работат во технолошко индустриските развојни зони коишто се доминантно со странски капитал и останатиот корпоративен сектор. Странските компании од зоните на пример, краткорочните обврски ги плаќале во просек за 80 дена, додека пак во целиот бизнис сектор тој просек достигнува до 170 дена. За наплата на побарувањата, компаниите од зоните чекаат просечно по 79 дена, што е за 37 дена по брзо отколку просекот во приватниот сектор.