ФАЈЗЕР ПРЕКУ СОФИЈА ЌЕ ДОЈДЕ ВО МАКЕДОНИЈА: Во вторник Филипче и Лончар ќе разговараат за набавка на Спутник од „Торлак“
Објавено во: Македонија 16 Април, 2021
Министерот за
здравство Венко Филипче во неговото редовно информирање на јавноста околу
состојбата со корона кризата во земјава, како и процесот на вакцинација,
денеска изјави дека дефинотивно е потврдено пристигнувањето на 10.000 дози од
вакцините на Фајзер в понеделник. Пратката ќе пристигне во Софија, а нашите
здравствени власти, како што истакна министерот се подготвени за безбедно
преземање.
-Вакцините од Фајзер ќе пристигнат на аеродромот во Софија, а попладне со специјален транспорт ќе бидат донесени во Скопје. До добивањето на вакцините на Фајзер во понеделник, на располагање имаме уште 10.000 вакцини од Астразенека, нешто помалку од 3.000 од Спутник и 1.000 кинески вакцини, соопшти Венко Филипче.
Истовремено, министерот најави дека во вторник ќе отпатува во Белград за да се сретне со колегата Златибор Лончар и со директорката на Институтот за вирусологија „Торлак“ со кои ќе разговара за соработката, за размена на експертиза, како и за стратешки план за набавка на вакцините Спутник V кои ќе се произведуваат таму.
– Во овој момент не ни се потребни вакцини, но не можеме да претпоставиме како ќе се одвива пандемијата. Ќе разговараме за тоа Институтот „Торлак“ да ни биде стратешки партнер во делот на набавка на вакцините со оглед на тоа како ќе се одвива пандемијата, посочи Филипче.
Инаку, во Македонија, заклучно со вчерашниот ден се вакцинирани 35.000 граѓани и вакцинацијата продолжува според старосните групи. На новинарско прашање, дали со вакцините Фајзер ќе бидат вакцинирани трудници, Филипче одговори дека имунизацијата ќе продолжи според планот, односно според возрасните групи.
А.Б.